Shon Preimo tawata biba den un caya caminda tur cas tawata mescos cu otro. .

Net net manera e tawata gusta. Tur e otro hendenan den Shon Preimo su caya tawata opina mescos.

“Esta un caya nechi nos tin,” nan tawata bisa.

Den esei un dia… Un meuchi a bula pasa riba cas di Shon Preimo. E tawata carga un blek’i ferf oraño cla. Ningun hende no sa pakico.

Y el a laga e bleki cai net riba cas di Shon Preimo.

Di tal manera cu a forma un asina un spat’i ferf grandi colo oraño riba cas di Shon Preimo. “Ai dios. Esta un mala suerte.” Tur hende a sclama. “Shon Preimo lo tin di ferf su cas di nobo.” “Mi ta supone cu lo mi mester,” Shon Preimo a reacciona. Ma e no a core bai ferf su cas mesora. El a keda wak e spat’i ferf grandi oraño hopi ora largo. E bisiñanan a bin tur fada di tin di sigui mira e spat’i ferf grandi oraño. Un di nan a laga sa: “Shon Preimo, mare bo por a dicidi di ferf bo cas pa caba.” “Ta bon,” Shon Preimo a bisa.

El a cumpra ferf blou y ferf blanco y e mes anochi el a dal bai. El a probecha pinta anochi pasobra e ora ei ta mas fresco. Ora ferf a caba, e dak tawata blou. E murayanan tawata blanco. Y e spat’i ferf grandi oraño tawata tei keto bai. El a dicidi cu e mester mas ferf. El a cumpra ferf cora, ferf hel, berde y biña.

Su mainta e otro hendenan den e caya a sali for di nan cas. Nan casnan keto bai tawata parce otro. Ma esun di Shon Preimo tawata manera un arco iris. E tawata manera un mondi. E tawata manera un explosion di color.

Ata e spet’I ferf grandi oraño stret bai. Ademas tawatin spat’I ferf chikito oraño.

Y tawatin strepinan. Nan a mira olifante, leon y mucha muhernan bunita y un truck. E hendenan di: “Preimo bo a

bira loco di berdad, el a bruha completamente, el a bira

kens.” Y nan a cana bai ta gruña. E mesun dia Shon Preimo a dicidi di cumpra herment di

carpinte. Y anochi mes el a lanta un

toren riba su dak di cas, djei el a pinta un holoshi riba dje.

Su siguiente dia e hendenan a sclama: “Preimo a bira

loco loco, awor si el a turdi, e ta tur tolondra.”

Pesei nan a dicidi cu nan lo haci manera nan no ta

ripara nada.

E anochi ei mes Shon Preimo a yena un picop pata pata di cos berde. El a planta pal’i coco, mat’i sumpiña, siboyo y hopi otro cos. Su mainta el a cumpra un hamaca y un caiman.

Ora e otro hendenan a sali for di nan cas, nan a mira Shon Preimo ta zoya den su hamaca entre dos pal’i coco.

Nan a mira un caiman drumi riba yerba. Shon Preimo tawata bebe

limonada.

“Preimo a pasa di mas.” “Esaki seper tawata un caya nechi.” “Preimo, ma ta kico bo a haci cu bo cas?” e hendenan a grita. “Mi cas t’ami y ami t’e. Mi cas ta caminda mi gusta ta y e ta parce tur mi soñonan,” Shon Preimo a contesta. E ora e hendenan a dicidi di bai. Nan a pidi e homber cu tawata biba pega cu Shon Preimo, e bai papia cu ne. “Bis’ele cu su cas mester ta mescos cu esnan di nos, pa asina nos por tin un caya nechi, decente atrobe.”

E homber a bai papia cu Shon Preimo e mesun

anochi. Nan a sinta bou di e pal’i coconan ta bebe limonada

y nan a papia henter anochi largo.

Ora e hendenan a sali for di nan cas nan a mira un barco cora y hel, pega cu e cas di Shon Preimo.

“Ma ta kico bo a haci cu bo cas?” nan a grita e homber. “Mi cas t’ami y ami t’e. Mi cas ta caminda mi gusta ta y e ta parce tur mi soñonan,” e homber cu semper a gusta barco masha a bisanan. “e ta mescos cu Preimo!” e hendenan a sclama. “E ta tur bela, e ta chifla, el a pasa te bira pasa!” Y a sosode cu un pa un , nan a bai bishita Shon Preimo anochi lat. Nan tawata sinta bou di e pal’i coconan y bebe limonada y combersa di nan soñonan. Y cada bes cu cada un di nan bai bishita Shon Preimo su cas, e mesun manece e persona ei tawata dal bai cuminsa cambia su mes cas pa e bira e cas di su soñonan.

Anto ki ora un hende straño bini pasa e caya di Shon Preimo y su bisiñanan, e stranhero ta bisa: “E caya aki si no ta nechi, decente.” Mesora tur hende ta bisa: “Nos caya ta nos y nos ta e. Nos caya ta caminda nos ta gusta ta y e ta mescos cu nos soñonan.”